ЦIаьххьана дай некъан тача,
Йиш йац хIинца-м цхьанхьа кхача,
Даг чохь хIоьтти Iаьржа ор.
Махо чIегIи, дохош туьйра,
БIаьстене некъ бостуш шуьйра,
Схьадиллина хилла кор.
Нохчийн лараш йайъа лаьттахь,
Йохий коьрта шахьар, аьтта,
ХIаллакбарца мехкан Iуй.
Йохоза йерг йоккхуш дола,
Магош шайна хьарам къола,
Махкахь хьийза къиза къуй.
Амма царал къиза хилла,
Кхин къуй, шайгахь долуш хIилла,
Лечкъон дагалецамаш,
Цара йицйи хийла марзо,
Ца йицйинарг къизчу дарцо,
Йохош йукъаметтигаш.
МеттахIиттош доьхна цIенош,
ХIитталур дац дайна денош,
Йоьхна марзо, йаьгна йахь.
ТIевогIушверг, ваха гIала,
Гина воцург хилла бала,
Цкъа ойла йеш, сацалахь.
Гергарлонех хилла овкъарш
Iохку кхузахь массо новкъахь,
Сий-ларам беш, баккха ког.
Адмаш даьхна кхузахь хьалха,
Iуьйрре гIовттуш, доьлхуш балха,
ЧIогIуш-доьллуш хийла ков.
Хьалхалерчу дикчу нехан
Йисна серло кхузахь йеха,
Сацалахь и тергалйеш.
Сатасарца йаьржа иза,
Урамашца, Соьлжа-хица,
Къагош маьждиг, цуьнан беш.
И серло ахь ларйе сица,
Цо гIо дийр ду вонца къийса,
Даим сема латтош иэс.
Серло лоруш хуьлда бераш,
Ца йицйеш и довларх шераш,
Кхетам меттахь латтабеш.
Лекха цIенош стигла кхийдарх,
IиндагIашца алсамдийларх
Хир дац серло эшайеш.
Хьайца ларйе ахь и серло,
Дагалецам цуьнца денло
Хиллачуьнца чIагIйеш зIе.
Цхьа меттиг йац мерза дахар
Кхузахь кхехьна доцуш наха,
Дикане шаьш туьйсуш са.
Хиллачеран йу гIайгIанаш,
Iохкурш хилла шайх гIайракхаш,
Йу уьш бIаьрхийх хилла ша.
ХIокху гIалахь кхиндIа вехарг,
Хиллачийн ду хьоь цхьа дехар:
ДIахьо церан ойланаш.
Йиц а ца йеш, хьайца йита,
Сатийсамаш бита иштта,
Баьгнарш, хуьлуш овкъарш шайх.
Орга №4. 2023
Оставить комментарий