ХIетахь хилла луо а дешна,
Лайлахь лараш йайна, тешна,
Биснарг дагалецам бу.
Иза иэсехь ларбан гIерташ,
Дагна хили чевне дерташ,
Церан моьнаш кIорга ду.
Дахкаро дIалаьцча гIала,
Са ца дуьтуш малхедала,
Схьа тIетаьIча маьркIаже,
Арадовлу урам-новкъа,
Шайна тIаьхьа йуьтуш овкъарш,
«Шушш» деш, текха саьрмикаш.
Царах къаьхкий, ведда вогIу,
КIелхьара а халла волу,
Веъна кхаьчча хIусаме.
ЦIа чохь йекхна хета стигла,
Бекаш хезаш мукъам Стинган,
Синтем буссу буьйсане.
Кхетаман цкъа кIоргехь хилла,
Сатийсамаш кхочушхилла,…
Дахар, иштта латта хьо!
…Карзахваьлларг, хьо ма гIерта
Йохон доза декъна керташ,
Уьш йохоро тем ца ло.
Уллохь йолуш и Лайн-Аьзни,
Шийла денош доггах дезна,
Луо хьийзарехь ирс а гуш.
Шеран хенаш цхьаьна ийна,
Йерриге хан – бIаьсте сийна
Хеташ, вехи, ирсо зуьйш.
ЧIегIардиган бен – цхьа хIусам
Йеш, къахьийги дийнахь буса –
Эрна хили, хьаькхча мох.
Бен чубожош, тIекIелбоккхуш,
Цу чохь хилла марзо отуш,
Мох чекхбели, дагах, хьох.
Бена чуьра эгна кIорнеш,
Син Iаьнарца хIора йохйеш,
Карахь лелий шерашца.
Царна бен бан меттиг лоьхуш,
Къинхетам бар Деле доьхуш,
Дуьне гезди некъашца.
Дагна марха тIейиллина,
Ихи денош, дог диллина
Соьлжа-гIалин диканех.
ХIетте йара дегайовхо,
Шеко эккхош, шеко човхош:
Хьаьвзар Даймохк зикарехь.
Сих-дегIах а шело хьерчаш,
Ца карайеш йовхо кхерчан,
Дукха лийли хийрачохь.
Шина дагна карадора,
Махна дуьхьал хIотта гIора,
Атта ловра беза мохь.
ГIайгIа хиларх, лан ца тиггал,
ЦIена латтайора стигал,
Гергарлонийн, марзонийн.
Iаьржа оьрнаш лахахь дуьтуш,
Стигалхула кема дуьгуш,
Хийла некъаш шиммо ди.
Ча такхийна тача дуьллуш,
Седарчийн лар тIаьхьа йуьтуш,
Ирсан махка вуьгу цо…
Йиш йу хIинца-м паргIатвала
Воккхаверца, денлуш гIала,
ТIеман херцарш кхин ца го.
Оставить комментарий