Малх чубуза лахбаллалц, Батта тӀехь Ӏийра Маьлха-Аьзний, Бабин ЧӀирдиггий, шаьшшимма дийначу зезагашна йуккъе a хиъна. Зезагаш хӀор а сохьтехь даккхий хуьлуш дара. Эххар а уьш, дитташ санна, лакха а девлла, дӀахӀиттира.
ЧӀирдиггий, Маьлха-Аьзний, шаьшшиъ царна йуккъехь тиладаларна кхера а делла, Баттана йистехьа дӀадоладелира. Амма эццахь чӀогӀа мох белира.
– Схьайола кхуза, ор чу дӀалечкъа вайша, мох дӀасаццалц, – мохь туьйхира ЧӀирдига, цхьана жимчу ор йисте дӀа а хӀоьттина, шена тӀаьхьахьаьдда йогӀучу Маьлха-Аьзнига.
Ор чохь дӀатебна Ӏийра и шиъ, мох дӀасаццалц.
ТӀаккха, цу чуьра хьала а даьлла, дIасхьахьаьжча, цу шинна цхьа а зезаг ца гира.
Йукъ-йукъахь Ӏохкуш зезагийн патарш гора Батта тӀехь. Цец а даьлла, дӀасхьахьоьжучу цу шинна хьалха а йеана, дӀахӀоьттира йexха кӀозарш йолу цхьа сирла-сийна хӀума.
– Со Мох бу, – элира цо. – Ас паналлехула дӀадаржийра аш дийна зезагаш.
Лаьтта тӀехь санна, дагадеънарг лело ма ца мега кхузахь.
– Кхин дийр дац охашимма иза, – элира Маьлха-Аьзнис, бӀаьргаш охьа а хьовсош.
Мох, тӀома а баьлла, дӀабахара. ТӀаккха ЧӀирдиг а эцна, Маьлхан тӀаьххьарчу зӀаьнара тӀехула шен цӀа йахара Маьлха-Аьзни………………………………………
ТIаьхье йеша “Стела1ад” журналехь (№3.2024)
