ЙоI марехь йолу масех бутт бара. ТIаьхьарчу хенахь, ша децIа йеача, да цIахь ца каравой, самукъа ца хуьлура хIара.
«Колхида» машенахь балхахь волу да, цхьацца гIирс, кир-мохь оьций, кхечу гIаланашка воьдуш-вогIуш, масех де долура.
ЙоIа шен дена сагатдора. Дена йоI а йара хьоме. Шен ненах, Аружех, тера йу олура иза дас. Йуьхь-сибат, йелакъажар: «Тапп Аружа йу!» – олура дас, шен ненан цIе а йоккхуш.
ЙоIана-м ца гинера шен денана, йоI дуьнен чу йалале Сибрехахь дIакхелхинера иза. Тахана самукъадаьллера йоьIан, кертахь шен ден аз а хезна. Схьагучуваьллачу шен дена дуьхьалхьаьдира йоI, хьалха санна куьйгаш даржийна, маракхеташ шен дена.
– Гугала, хьо йеана вайга? ХIун ду цигахь? Хатта мел везарг могуш Iай? – олуш, йоIах дIавоьрзуш санна, дехьа чу велира, йоьIан нене дIахьаьжна.
– Схьайолахьа, охьахаахьа, со шун дена чай а делла схьайогIу хьуна, – элира нанас. – Казахаша санна, ша хIума кхаллале чай молуш Iедал ма дай шун ден, – аьлла, йела а луш, нанас сихха дена чай даьхьира.
Шен нене вистхуьлуш, ден аз оьгIазе, нана бехказайуьйлуш санна, лохо-о йистхуьлуш хийтира йоIана. Цаьршиннан къамел ма-дарра ца къаьстара кхунна. Чохь керла хIун ду, ша йоцуш, хIун эцна, хIун дина хьоьжуш, йолайелира иза чухула. Бакъду, ша цхьана хIуманна тIаьхьа ца кхуьуш санна, хетара йоIана.
– Нана, – элира цо, чуйеанчу нене, ларамза цхьа дала цадезарг даьллера-те соьгара? – Суна хьалха санна ма ца хийтира тахана сан да. Со шена мараиккхича, башха тергал ца йеш, вистхилла, чу ма вахара иза.
– ЛадогIал соьга, хьо дукхайахарг, – элира нанас, йоIана уллехь охьахууш. – Хьоьгара хIумма а ца даьлла, сан бехк бу берриге, хьуна шен хенахь хьехам цабарна.
ЙоI маре йоьду, децIа йогIу, захалош вовшийн дика-вуоне боьлху. Уьш дуьненан хIуманаш ду. Кхин цхьа хIума ду хаа дезаш: доьзалхочух йолуш, хIинца санна, йоI децIа йеача дена, воккхахволчу вешина, девешина къайлайолуш хила йеза, тIехь шуьйра, паргIат коч хила йеза, – бохуш, шен йоIана хьехам бора нанас, цуьнан белшах куьг хьоькхуш……………………………………………………………………………….
ТIаьхье йеша “Орга” журналехь (№2.2025)
