Эсаран беттан 9-чу дийнахь Айдамиров Абузаран ц1арахчу къоман библиотекехь Мусаев Сулиманан“Орамаш” ц1е йолу киншкин презентаци д1айаьхьира.
Сулиманан иза шоллаг1а киншка йу. Хьалхара киншка “Брелок” оьрсийн маттахь арайелира Москвахь 2012-чу шарахь. Цуьнан дийцарш гочдина х1ирийн, балкхаройн, желтойн, г1езалойн, удмуртийн, кхечу меттанашка. Арадийлина Соьлжа-Г1алахь, Москвахь, Буру-Г1алахь, Нальчикехь, Казанехь, Ижевскехь…
Баьхкинчара лаккхара мах хадийра Сулиманан кхоллараллин. Сулимана вайн халкъан дахарх йазйо, халкъо лайначух, д1адаханчух а, долучух а. Д1адаха х1умма а йиш йац, иэс дийна мел ду. Иэс дан ца дайта йозанехь охьадилла деза.
Мусаев Сулиманан дийцарийн турпалхой мог1арера нах бу, амма х1ор стаг шен доккха дуьне а долуш. Йаздархочо гойтург иза ду – стеган чоьхьара доккха дуьне. Сулиманан говзарш нохчийн литературин 1аматашна йукъайахна, дешархоша а, хьехархоша хазахетарца йоьшу уьш. Т1екхуьучу т1аьхьенна схьаэца дуккха а масалш ду Мусаев Сулиманан дийцаршкахь.
Дала т1аьхье беркате йойла хьан, Сулиман!Кхиамаш хуьлийла хьан кхоллараллехь!
