«ХIуманан сахьт бен дац», –
Олуш ду халкъо.
Мел чIогIа хиларх, дарц
Шен хеннахь тоь.
Цкъеллиг цкъа эшор яц
Харцоно бакъо,
Баржор бац
Лекха арц,
Ца дуьтуш доь.
Замано, махкана
Оьшуш а хилла,
Хан кхаьчча,
Кан баьтIча,
Кхоьллира вай.
Пхьарматан серлоно
Къагийра илли,
Гуьйренан
Iуьйранна
Сенбира бай.
Цу цIеро вохвина,
Дог карзахдаьлла,
Массо а
Вахара,
Шеца и хьош.
Дахарехь айина
Чекхйоккхур аьлла,
ХIораммо
Ша-шена
Делира дош.
Цул тIаьхьа цхьаболчийн
Дахделла тIемаш,
Къолам а,
Цергаш а
Иръелларш бу.
Тахана хиндолче
Ца боьхуш темаш,
Поэзин цIе эцна
БогIурш а бу.
Некъ шера цахиларх,
Шу къар ма лолаш,
Диебар ду,
Хьекъар ду
Кхана шун хас.
Лаьмнашна тIехула
Иллешка долуш,
Декийта,
Декийта
Пхьарматан аз!
………………………………
ТIаьхье йеша “Орга” журналехь (№3.2025)
