Даймохк
ЦIеран алу йукъара
Баьккхина, хьо денбина
Вайн турпалчу кIенташа,
Хьан паргIато йезарна.
Хийла эгна къонахий,
Ларбеш маршо, лардеш сий.
Уьш хьан кийра бирзина
Уьш хьан дагах дIаийна.
Церан дагахь хилла дерш,
Церан дуьхьа кхочуш деш.
Каде хьийза кIентий хьан,
Даймохк, тахна хьо хазбеш.
Дегнаш огуш, чахчадеш,
Халонаша зийна вай.
Мохк безаро ницкъ а лой,
Йуха кога дулу вай.
Вайн мехкарийн хазалла,
Малхах тарйан билгал йу.
Вайн къонахийн оьздалла
Шайн дайшкара схьа ма йу.
Ас хастам бо Далла вайн,
Кхолларна цо нохчий вай.
ГIиллакх вайчул хаза дац
Цхьаьнне мехкан лаьтта тIехь.
Ненан мотт
Дуьненчу со йаьлчахьана,
Дуьххьара сан лере беъна,
Ма кIеда, ма мерза хьерча,
Ненан мотт – сан дагах, сох а.
Сан нанас бийцарна марзбеш,
Сан цIийца лела хьо аьхна.
Ненан мотт – сан деган хазна,
Хьоьца со ирс долуш хета.
Ненан мотт – сан деган йовхо,
Ненан мотт – сан маьлхан серло,
Тхан дайша дитина совгIат,
Ду тхуна хьо доккха ниIмат.
……………………………………………..
ТIаьхье йеша “Орга” журналехь (№2.2025)
