Селхана дIавоьлли оха Руслан, мармаран кIайн чурт а дугIуш.
Набахтехь кхойтта шо даьккхинера цо, царах пхиъ карцарехь а доккхуш, шен классера кIант верах, чувоьллина, оцу кхойтта шарахь кхин маьрша а ца волуш.
Иза цамгарца веара цIа, кхайкхочу лазарх пехаш цIенна дIа а девлла.
Да-нана тоххарехь деллера цуьнан, иза лаьцна волуш – доккха ши стаг дара – тIаьхьуо вовшахкхетта, да кхин а воккха волуш, хIара Руслан бен, кхин доьзалхо а воцуш.
Iа шийла деанчу 1973-чу шарахь – Руслан лаьцна ши шо даьлча – йоккхачу стага, – Русланан нанас, – кIур араболу пешан херо дIа а къевлина, хьахар а хилла, садукълуш, деллера цуьнан дай-наний, кIант лаьцна пхи шо даьлча.
Ков-керт тишделлера, цIа дерриг а лаьттах дахча санна, жимлуш, гара а даьлла.
Да деруо стаг вара цуьнан, забарх кхеташ а воцуш, ша-шеца къовлавелла, цунна дуьхьал ца кхета, наха геннара цунна некъ а буьтуш.
Дешаран шо йуккъе даханчу хенахь, маццах кху йуьртара Ростох махка жа тIе ваханчу цхьаннан кIант кхечира тхан классе, зоьртала, онда, цIен месаш а йолуш, аттестат дика хилийта, аьлла, дас цигара цIаваийтина, ненайишица Iаш а волуш.
Iалбек йара цуьнан цIе. Цо ша-ма, Алибек, олий, кховдадора куьг. Цигахь, Ростохахь, буй тохаран спортехь кхиамаш баьхна а хиллера иза, тIаьхьуо цо ша тхуна дийцарехь.
Тхо цунна хьалха, меашна йукъахь хIинцца даьхна кIорнеш санна, хетара, белшашка бен хьала а ца кхочуш.
Iалбек воьддушехь, ша ишколе веанчу хьалхарчу Iуьйранна, дуьххьарлера урок дIа а йаьлла, горгали бекча, Румисин кочавахара: «ЙоI, хьо ма хаза йу, хьо сан хила йеза!» – олуш.
Румиса хаза йоI йара, тхан йуьртахь цул хаза йоI цхьа йоI а йоцуш, тайниг санна, жимачу дегIахь, сийначу бIаьргийн дехха Iаьржа цIоцкъамаш а долуш, хенашка кхочуш Iаьржа месаш а йолуш……………………………………………………………….
ТIаьхье йеша “Орга” журналехь (№1.2025)
